Meänkieli

Tervettulema Merimusehiin! Merimyseo oon Ruottin kansalinen myseo ruottalaisen merisuojelun histuurialle, vuesta 1552 tähän päihvään. Keskelä tätä histuurialista ympäristöä Stumholmin saarela Karlskronassa, Merimyseon pitkä kaunis rakenus oon siotettu pitkin laituria, paikassa joka oon monta sattaa vuotta ollu militäärin hallussa.

Tietoa Merimuseosta

Mallikammiista museoksi

Merimyseolla oon perintheet vuesta 1752, ko kuninkas Adolf Fredrik perusti Mallikamarin Karlskrohnaan. Mallikamarissa oli laivamallia ja rakenuskaavoja, joita käytethiin teknishiin ratkaissuin ja uussiin laivanrakentamissiin. Joitaki esihneitä tehthiin näyttelyitä varten. Käynti Merimyseon mallikamarissa antaa kiinostavan käsityksen laivanrakentamis- ja insinööritaijosta 1700-ja 1800-luvun Ruottissa.

Meän kokoelmat

Merimyseon kokoelmissa löytyy ruottalaisen merisuojelun histuuria säästettynnä. Kokoelmissa löytyy 36 000 esinettä, 240 000 valokuuaa, 22 000 riitinkiä, 1700 volyymiä arkiivitokymenttiä ja 30 000 kirjaa. Joitaki oon nähtävillä meän näyttelyissä mutta issoin osa löytyy meän makasiinistä, arkiivistä ja kirjastoista, turvalisesti säilytetty tulevaisuuele.

Meän näyttelyt

Merimyseossa oon parikymmentä näyttelyä, jokka muun muassa selittävä elämästä merelä, laivanrakentamisesta ja sukalusvenheenjahista kylmän soan aikana. Astu sisäle sukalusvenheessen Neptuhniin, joka oli myötä traamassa ko venäläinen sukalusvene U-137 ajo karile Karlskronan ulkopuolela. Näe yhen mailman erityisiimistä kokoelmista keulakuvista, eli mene Itämeren vesipinnan alle ja näe jäänökset sotalaivasta Prins Carl, vuesta 1684. Merimyseolla oon kans monta muuta laivaa, muun muassa miinanraivaaja Bremön 1940-luvulta ja meripoikalaiva Jarramas, joka laskethiin vesile vuona 1900.

Osa maailmanperintöä

Karlskrona oon Unescon mailmanperintölistala sen vuoksi ko se oon hyvin säilytetty esimerkki euruuppalaisesta sotalaivakaupunkista. Merimyseossa sie saatat kattoa esittelyjä, näyttelyjä ja esihneitä, jokka monela laila selittävä sotalaivakaupunkin histuurian.

Tervetuloa reissuun läpi ruottalaisen merisuojelun histuurian!

Vieraile Merimuseossa

Tärkeä tietää

Elläimet ei ole lualiset. Poikkeus vain virkakoirile ja apukoirile joila oon toistus.
Valokuuaaminen: Se oon lualista filmata ja valokuata (ilman salhaamavaloa), omale käytöle, koko myseossa.
Ruoka ja juoma: Se ei ole luoalista ottaa myötä minkhäänlaista ruokaa, klassia eli juomaa näyttelyihin. Toisela vuoninkilla oon ruokalaukkuhuone sulle joka halvat ottaa matkhaan oman ruan.
Väskyt ja säilytys: Vaatehuohneessa oon kaappia pienemille väskyile. Älä ota isoja väskyjä myötä mysehoon ko niile ei ole säilytystillaa.
Lapset alla 12 vuotta: Turvalisuuen vuoksi, lapset alle 12 vuotta häätyvä olla täyen kans koko aijan myseossa. Tämä jällaa kans kouluile, friitiitsile, iitrottiseuroile jne. Isomat lapsiryhmät saattaa jakkaa, mutta yks täysi häätyy seurata jokhaista ryhmää koko aijan.

Ennen vierailua

Löyä tänne
Merimyseo oon Stumholmila, Karlskronan keskustassa. Sie saatat marsia sinne keskustasta, käyttää kolektiivikyyttiä eli piiliä.

Marsimalla eli pyörälä
Jos sie lähet Stortorgilta, sie seuraat Kirkkokatua törmää alle ithäänpäin. Mene yli Trotninkinkaun ja jatka Kirkkokatua sillale saakka, joka mennee Stumholmile. Jatka suohraan etheenpäin sillan toisela puolela, niin sie näet heti Merimyseon sinun vasemalla.

Kollektiivi kyytti (pyssi eli juna)
Jos sie tulet pyssilä eli junala Karlskronan sentraaliasemalle, se oon helpoin seurata laituria pitkin Östra Hamngatan. Ko sie tulet Stumholmin sillale sie menet pitkin siltaa ja jatkat suohraan etheenpäin. Se ottaa suunile 20 minuttia marsia myseolle Karlskronan matkasentrymistä.

Piililä
Jos sie tulet piililä E22asta, sie otat muturitien Karlskronan keskusthaan. Käänä vasemalle vierashaminalla ja aja Östra Hamngatale. Seuraa viittoja Merimyseon parkkeerinkhiin.
Parkkeerinkistä sie marsit ithäänpäin Stumholmin sillale. Jatka suohraan etheenpäin jälkhiin sillan niin sie olet heti Merimyseolla sinun vasemalla.

Parkkeerinki
Niile, joila oon hankala kulkea (joila oon voimassaoleva parkkeerinkilupa), löytyy parkkeerinki myseon sisälemenon lähelä. Merimyseolla oon maksettavia parkkeerinkipaikkoja Sparretalola.

Lapsille ja perheille

Täälä löytyy sovitettuja aktiviteettiä näyttelyissä, jokka innostava lapsia yhtheispelhiin. Ruokapaikka tarjoaa lapsile mielyttävää ruokaa ja lastentoolia saattaa lainata ko niitä oon vaphaana. Tualettiä, missä oon hoitohuone, löytyy sisäletulovuoninkilla ja ruokalaukkuhuone oon toisela vuoninkilla. Lapsenvaunun saattaa ottaa sisäle näyttelyhuohneissiin, mutta varo ette sie et ole oven eli ulosmenon tielä. Muista ette lapset alle 12 vuotta häätyvä olla täyen kans koko käynin aikana myseossa.

Pääsy

Hissiä oon joka vuoninkille ja pääsysovitettuja tualettiä löytyy sisäletulon lähelä. Parkkeerinki, niile joila oon hankala kulkea (joila oon voimassaoleva parkkerinkilupa), löytyy myseon sisälemenon lähelä.

Audioguide

Met tarjoamma audioguidin engelskaksi.
→ Audioguide in English

Lue lisää

Lue lissää Merimyseon histuuriasta ja Merimyseon tutkimisesta ja säilytystyöstä engelskaksi:
→ For further information please visit the English version on our website